Նոյեմբերի 2-ին տեղի է ունեցել ՀՀ դատախազության կոլեգիայի ընդլայնված նիստ: Այս մասին PanARMENIAN.Net-ին հայտնում են Գլխավոր դատախազության մամուլի ծառայությունից:
«Յուրաքանչյուր դատախազ պետք է հասկանա, որ ինքը հանրապետությունում իրականացվող քրեական քաղաքականության առանցքն է՝ դրանից բխող պարտավորություններով: Դատավարական ղեկավարում իրականացնող դատախազները պատասխանատվություն են կրում ինչպես նախաքննության, այնպես էլ՝ մեղադրանքի պաշտպանության որակի համար:Դատախազի յուրաքանչյուր որոշում պետք է լինի բացատրելի օրենքի շրջանակներում և արդարության տեսանկյունից հասկանալի ժողովրդի համար»,- հայտարարել է գլխավոր դատախազ Աղվան Հովսեփյանը:
Նա նախազգուշացրել է, որ քրեական գործի նյութերը խեղաթյուրելու, քրեական գործը փակուղի մտցնելու յուրաքանչյուր դեպք դառնալու է առանձին քննարկման առարկա: Չի հանդուրժվելու «մատակարարված» մեղադրյալների երևույթը, իսկ արձանագրվելու դեպքում քրեական գործեր կհարուցվեն թե՛ հետաքննիչի, թե՛ քննիչի, թե՛ դատախազների նկատմամբ:
ՀՀ գլխավոր դատախազի տեղակալ Ա.Թամազյանը, ով նաև ՀՀ դատախազության որակավորման հանձնաժողովի նախագահն է, անդրադարձել է ծառայողական պարտականությունները պարբերաբար խախտող աշխատակիցներին: Գլխավոր դատախազը ասել է. «Դատախազի կերպարը վարկաբեկող անձինք չպետք է աշխատեն համակարգում»:
Աղվան Հովսեփյանը հանձնարարել է որակավորման հանձնաժողովին խստացնել պահանջները` կարևորել ոչ միայն մասնագիտական ունակություններն ու գիտելիքները, այլև բարոյական նկարագիրը:
Անդրադարձ է եղել նաև նախաքննության ժամկետներին:
«Պետք է կրճատել տեղի ունեցած հանցագործության դեպքից մինչև հանցագործին դատապարտելու վերաբերյալ դատավճիռն ընկած ժամանակահատվածը: Այլապես՝ տարիներ շարունակ ձգձգելով նախաքննությունն ու դատաքննությունը՝ հասարակության մոտ կարծիք է ձևավորվում, որ հանցագործը մնացել է անպատիժ: Պատժողական քաղաքականությունը կծառայի իր նախականխիչ նշանակությանը, եթե հանցագործները դեպքից անմիջապես հետո ենթարկվեն պատասխանատվության»,- ասաց գլխավոր դատախազը:
