«Ժառանգության» առաջնորդ Րաֆֆի Հովհաննիսյանի ՝ նախագահին ուղարկված նամակին պատասխանել է ԱԺ նախագահՀովիկ Աբրահամյանը:
Այս մասին այսօր լրագրողների հետ հանդիպման ժամանակ ասաց «Ժառանգություն» կուսակցության փոխնախագահ Արմեն Մարտիրոսյանն ու ավելացրեց, որ պատասխանն իրենց չի բավարարում և չի առաջարկում խնդրի լուծում.«Արծարծված խնդիրները մնացել են չլուծված, բացառությամբ ԶԼՄ-ներին վերաբերող կետի. Հեռուստատեսությունը նախորդ ընտրությունների համեմատ ավելի ազատ է»:
Խոսելով ընտրակաշառքը բացառելու մասին, Մարտիրոսյանն ասաց, որ որևէ կուսակցություն չունի օպերատիվ հետախուզական գործողություններ իրականացնելու հնարավորություն և միայն այդպես է հնարավոր բացառել օրինախախտումները:
«Եթե մեզ օրենսդրորեն տան այդ հնարավորությունը, մենք կաշխատենք, բայց դա իրավապահ մարմինների գործն է»:
Անդրադառնալով հացադուլ հայտարարած նախագահի թեկնածու Անդրիաս Ղուկասյանին՝ Արմեն Մարտիրոսյանը նշեց. «Ինքս դժվար թե կարողանայի հացադուլ անել, նույնիսկ ծոմ չեմ պահել, բայց հարգանքով եմ վերաբերում նրա որոշմանը, եթե քաղաքացին որոշել է պայքարի այդ ծանր ձևն ընտրել, որը հակաօրինական չէ, ես նրան միայն առողջություն եմ մաղթում»:
