ՀՀ նախագահի թեկնածու Վարդան Սեդրակյանը հայտարարել էր, որ ակտիվ քարոզարշավը սկսելու է փետրվարի 1-ին, սակայն, ինչպես ինքն է ասում, ուրբաթը շաբաթից շուտ եկավ. «Հիմա ակտիվ քարոզաշավ անելը նաև բարոյական տեսակետից է անընդունելի, պետք է սպասենք Սահմանադրական դատարանի որոշմանը, ես չեմ որոշողը, մի քանի օրով աշխարը չի փլվի, սպասենք, տեսնենք ինչ է հայտարարում Կենտրոնական ընտրական հանձնաժողովը», - ասաց թեկնածլուն և հավելեց, որ Հայրիկյանի դեմ արված մահափորձը ամենաշատը նախագահի երկու թեկնածուի պլաններին խանգարեց.
«Ամենաշատը սրանից տուժեցին գործող նախագահն ու Անդրիաս Ղուկասյանը: Իհարկե, մնացածին էլ ինչ-որ չափով, ասենք, Րաֆֆին դժվար աջուձախ բարևելով շարունակի հանգիստ շրջել փողոցներով, իսկ գործող նախագահը սրանից հետո չի կարող ասել, որ գնում է դեպի ապահով Հայաստան: Անդրիասի հարցը մի փոքր այլ է, նա էլ ստիպված պետք է հացադուլը երկարացնի», - ասաց Վարդան Սեդրակյանը:
Անդրադառնալով Հայրիկյանի դեմ կատարված մահափորձի հնարավոր կազմակերպիչներին, Վարդան Սեդրակյանն ասաց, որ կարող է ասել միայն՝ ով չէր անի դա.
«Իշխանությանը դա միանշանակ պետք չէր, իսկ թեկնածուներից որևէ մեկը դա անելու ոչ ուժ ուներ, ոչ էլ՝ շարժառիթ», - եզրափակեց թեկնածուն:
