Մեծի Տանն Կիլիկիո կաթողիկոսության և Արցախի կառավարության համատեղ ուժերով Մարտակերտի շրջանի Կիչան գյուղի մոտ նոր գյուղ է հիմնվել` Նոր Կիլիկիա: Այս մասին տեղեկացնում է Արցախի հանրային հեռուստատեսությունը։

Այստեղ առաջին փուլով կառուցվել է 10 երկսենյականոց տուն, որից 2-ը, Մարտակերտի շրջանի վարչակազմի ղեկավար Վլադիկ Խաչատրյանի հավաստմամբ, տրամադրվել է արցախյան պատերազմում զոհված ազատամարտիկների ընտանիքներին, իսկ մնացածը վերաբնակիչներ են՝ նախկին ղազանչեցիներ։

Օրերս նոր գյուղի պաշտոնական բացման արարողության ժամանակ դրվեց նաև 24 բնակելի տների կառուցման հիմքը: Նոր 24 տներից 10-ը 3-սենյականոց կլինի, իսկ մնացածը՝ 2, տեղեկացրել է քաղաքաշինության նախարար Կարեն Շահրամանյանը։ Հետագայում նախատեսվում է նաև 50 տեղանոց մանկապարտեզ կառուցել, համայնքային կենտրոն և եկեղեցի։