Սկսվել է ընտրարշավ ԱՄՆ-ի Ներկայացուցիչների տան այն թափուր տեղի համար, որը մինչեւ անցած նոյեմբեր ամիսը զբաղեցնում էր Կալիֆորնիայից ընտրված հանրապետական Ռենդի Քանինգեմը: Այսօր սկսվել է ընտրարշավը, որին ի թիվս 7 այլ հանրապետական եւ երկու դեմոկրաատ գործիչների, մասնակցում է նաեւ Կալիֆորնիայի նահանգային նախկին օրենսդիր Հովարդ Քալուգյանը: 46-ամյա Քալուգյանը 1994-ից 2000 թվականների ընթացքում ներկայացրել է նահանգային կոնգրեսում Սան Դիեգոյի մարզը: 2003-ին նա անդամագրվել էր այն հանձնախմբին, որի նպատակն էր պարտության մատնել Կալիֆորնիայի նահանգապետ Գրեյ Դեյվիսին: Նույն թվին անցկացված ընտրությունների արդյունքում Դեյվիսին հաղթեց Արնոլդ Շվարցենեգերը: 2004 թվականին ԱՄՆ-ի Սենատի ընտրություններին Կալիֆորնիայից որպես թեկնածու մասնակցում էր նաեւ Հովարդ Քալուգյանը, սակայն նա պարտվեց` հավաքելով ձայների 11 տոկոսը: Հովարդ Քալուգյանը Ամերիկայի Հայ դատի հանձնախմբի գործուն մասնակիցներից է, հաղորդում է «Ազատություն« ռադիոկայանը: