Հուլիսի 3-ին, ժամը 00.03-ին մի շարք քաղաքացիներից ահազանգ է ստացվել, որ հորդառատ անձրևի հետևանքով անձրևաջրերը լցվում են Սյունիքի մարզի Սիսիան քաղաքի մի շարք փողոցների տներ և նկուղներ: Դեպքի մասին տեղյակ են պահվել կոմունալ ծառայությունների պետը և Սյունիքի մարզի Սիսիանի քաղաքապետարանի աշխատակազմի ղեկավարը: Դեպքի վայրում են գտնվում նաև Սիսիանի հրշեջ-փրկարարական ջոկատի օպերատիվ խումբը, խմբի պետի ժամանակավոր պաշտոնակատարը: Պարզվել է, որ անձրևաջրերը լցվել են մոտ 30 տներ և նկուղներ:

Նույն օրը ահազանգ է ստացվել, որ անձրևաջրերը լցվում են նաև Սյունիքի մարզի Աղիտու գյուղի մի շարք տներ և նկուղներ: Դեպքի մասին տեղյակ է պահվել Սյունիքի մարզի քաղաքաշինության պետը: Պարզվել է, որ մոտ 1 մ բարձրությամբ ջրաբերուկներով է լցվել Կ. Ջավադյանին պատկանող տունը (70 քմ), ինչի հետևանքով փլուզվել է տան պատը (6 քմ): Տունը բնակեցման ենթակա չէ: Տան տիրոջը տրվել է ժամանակավոր կացարան:

Ույծ գյուղում վնասվել է գյուղամիջյան ճանապարհը, իսկ Հ. Հարությունյանին պատկանող տունը լցվել է ջրաբերուկներով: Տունը բնակեցման ենթակա չէ:

Հորդառատ անձրևի հետևանքով անձրևաջրերը ողողել են Սիսիան քաղաքի Սյունիք, Կամո, Ն.Ստեփանյան, Սպանդարյան, Երիտասարդական, Գայի, Մ.Գորկի, Մկրտումյան, Սիսական և Շիրակ փողոցները և լցվել են որոշ տներ, նկուղներ, անասնագոմեր, խանութներ և արտադրամասեր: Վերոնշյալ վայրերում ջրահեռացման աշխատանքներ են իրականացնում Սիսիանի քաղաքապետարանի կոմունալ տնտեսության բաժնի աշխատակիցները և մարզային հրշեջ-փրկարարական ջոկատի օպերատիվ խումբը: Պարզվել է, որ Իշկափոս թաղամասում վնասվել են 300-ից ավելի տներ, այգիներ և բանջարանոցներ: Կստեղծվի հանձնաժողով վնասի չափերը ճշտելու համար: Այս մասին PanARMENIAN.Net-ը տեղեկանում է ԱԻՆ լրատվական ծառայությունից: