ՀՀ մշակույթի և Իտալիայի արտաքին գործերի նախարարությունների միջև պատմամշակութային ժառանգության պահպանության, ուսումնասիրության և վերականգնման բնագավառում տարվող ծրագրի շրջանակներում Արուճի համալիրում սկսվել է քարե կառուցվածքների վերականգնմանը նվիրված դասընթաց:
Դասընթացի նպատակն է ուսանող–վարպետներին տալ մասնագիտական գիտելիքներ վերականգնման համար կիրառվող շաղախի պատրաստման, մշակման, ինչպես նաև քարե կառուցվածքների մաքրման, ամրակայման և պահպանման տեխնիկաների վերաբերյալ:
Հայ վարպետների հետ քննարկվել են քարի քայքայման ախտորոշմանն առնչվող խնդիրներ, իտալիացի մասնագետներ Քրիստինա Տեդեսկին, Ստեֆանո Վոլտան և Մարկո Կուկկին անցկացրել են նաև գործնական աշխատանքներ: Դասընթացի ավարտին բարձր առաջադիմություն ցուցաբերած ուսանողներին կտրվեն հավաստագրեր:
Մշակույթի նախարարությունից PanARMENIAN.Net-ին հայտնում են, որ շարունակվում է նաև այս տարվա հուլիսի 4-ին մեկնարկած «Որմնանկարների վերականգնում և պահպանում» խորագրով դասընթացի երկրորդ փուլը, որի շրջանակում իրականացվում է նաև Արուճի գլխավոր եկեղեցու որմնանկարների ուսումնասիրման և մաքրման աշխատանքներ:
