ԱՄՆ նախագահ Բարաք Օբաման հետաձգել է այցը Մալայզիա բյուջետային ճգնաժամի պատճառով, որն արդեն հանգեցրել է իշխանության դաշնային մարմինների գործառույթների խախտմանը, հայտնում է մալայզիական Bernama գործակալությունը՝ կառավարության ղեկավար Նաջիբ Ռազակի վրա հղումով:
Ակնկալվում էր, որ ԱՄՆ նախագահը Մալայզիա կայցելի հոկտեմբերի 11-ին Հարավ-Արևելյան Ասիայի երկրների ղեկավարների գագաթաժողովի շրջանակներում: Օբամայից ու Ռազակից բացի միջոցառմանը պետք է մասնակցեին նաև Ինդոնեզիայի և Բրունեյի ղեկավարները, գրում է «ՌԻԱ Նովոստին»:
Վերջին 17 տարում կառավարության գործունեության առաջին կասեցման պատճառը ԱՄՆ բյուջետային ֆինանսավորման դադարեցումն է նոր ֆինանսական տարում, որը մեկնարկել է հոկտեմբերի 1-ին: Բյուջեի մասին վիճաբանությունը Սպիտակ տան ու ԱՄՆ Կոնգրեսի միջև փակուղի է մտել՝ հիմնականում երկրում բուժսպասարկման նոր համակարգի վերաբերյալ տարաձայնությունների պատճառով:
Նյու Յորքում մոտ 70 հազար դաշնային ծառայողների իրենց հաշվին արձակուրդ են տրամադրել: Երեքշաբթի նրանք աշխատանքի են դուրս եկել մի քանի ժամով: Գերատեսչությունների կայքերում հաղորդագրություններ են զետեղվել ժամանակավորապես փակվելու մասին:
