Դիարբեքիրի ռազմական դատարանում տեղի է ունեցել զինծառայության ընթացքում սպանված հայազգի զինվոր Սևակ Բալըքչըի գործով դատական հերթական՝ 20-րդ նիստը:

Դատավարության ժամանակ որոշվել է գործը վերանայել ամենասկզբից:

Բալըքչը ընտանիքը պահանջում է Հայոց ցեղասպանության զոհերի հիշատակի օրը՝ ապրիլիի 24-ին, Սևակ Բալըքչին սպանած Քըվանչ Աղաօղլուին պատասխանատվության ենթարկել կանխամտածված սպանության համար: Աղաօղլուն պնդում է, որ Սևակի սպանությունը միտումնավոր չի եղել:

Դատական նիստի ընթացքում ելույթ է ունեցել Սևակ Բալըքչիի հայրը՝ Կարապետ Բալիքչըն, նա պահանջել է ստուգել, թե, ըստ դատական նյութերի, ով է Սևակին ասել. «Հաստլիկ, ես քեզ կսպանեմ», հայտնում է Tert.am-ը: Ավելի վաղ ապացուցվել էր, որ դատավարության ընթացքում վկաների շրջանում սուտ ցուցմունք տվողներ են եղել, ինչի պատճառն Աղաօղլու ընտանիքի կողմից ստացած սպառնալիքներն են եղել:

Դատական հաջորդ նիստը տեղի է ունենալու 2015թ. փետրվարի 27-ին:

2011 թվականի ապրիլի 24-ին Թուրքիայի Զինված ուժերում սպանվեց ազգությամբ հայ զինծառայող Սևակ Շահին Բալըքչին: Դիարբեքիրում լսումների ժամանակ գրավի դիմաց ազատ արձակված Աղաօղլուն ներկա էր որպես վկա, դատին ներկա էր նաև Էրսոզը: Վկա Հաքան Էոքանատը, սպանված ծառայակիցը, հայտարարեց, որ Աղաօղլուն մեղավոր չէ Բալըքչիի մահվան համար, ամեն ինչ պատահաբար է ստացվել: Ըստ Էրսոզի, նա չի փորձել պաշտպանել ենթադրյալ մարդասպանին: Մինչ Սևակի զորացրումը մնում էր 23 օր:

Դիարբեքիրում դատավարության ժամանակ բարձրաստիճան զինվորականներից մեկը հայտարարեց, որ Սևակի սպանությունից հետո ականատես զինվորներից մեկը մոտեցավ նրան ու հայտնեց, որ Աղաօղլուն ասել է Սևակին. «Հաստլիկ, ես քեզ կսպանեմ»: Մյուս վկաները հերքում են նրա ցուցմունքները:

Դատարանը մեղավոր է ճանաչել նրա ծառայակից Քինանչ Աղաօղլուին անզգույշ սպանություն կատարելու մեջ և 4 տարի 5 ամիս ազատազրկման դատապարտել` փաստորեն հերքելով դիտավորյալ սպանության մեղադրանքը:

Դատավճիռը չբավարարեց Բալըքիչիների ընտանիքին, ինչպես նաև հանրության լայն շրջանակներին:

Ընտանիքի փաստաբան Ջեմ Հալավուրթը դեռ 2013-ին հայտարարեց, որ իրենք մտադիր են բողոքարկել դատավճիռը: Փաստաբան Ջեմ Հալավուրթը նշել է, որ Սևակի սպանության մեջ դիտավորություն են տեսնում, այն անփութության կամ անզգուշության հետևանք չէ: Եվ իրենք բողոքարկելու են վճիռը, քանի որ դատարանն անտեսել է իրենց ներկայացրած որոշ փաստեր և ապացույցներ, պատասխանատվության չի ենթարկել սպանության համար պատասխանատու բարձրաստիճան զինվորականներին և ճնշում է գործադրել սպանության ականատեսների վրա, ովքեր պաշտոնական տեսակետին հակասող ցուցմունքներ են տվել:

Նա հայտնել է, որ դատավճիռը քննվելու է Վերաքննիչ դատարանում, որից հետո անհաջողության դեպքում դիմելու են Մարդու իրավունքների եվրոպական դատարան:

«Պետությունը պարտավոր է պաշտպանել մարդու կյանքի իրավունքը, և միջազգային դատարանը բազում նման դատավճիռներ ունի հրապարակած: Այդ որոշումների լույսի ներքո, Թուրքիային պատժելու հավանականությունը շատ մեծ է»,-ասել է փաստաբանը: