Այն պատճառը, որի հիման վրա ցանկանում են ետ կանչել Հայաստանում ԱՄՆ դեսպան Ջոն Էվանսին, վիրավորական է Օսմանյան կայսրությունում նահատակված միլիոն ու կես անմեղ հայերի հիշատակի համար: Այդ մասին PanARMENIAN.Net-ի թղթակցին է հայտարարել քաղաքագետ Լեւոն Մելիք-Շահնազարյանը: Նրա խոսքերով, տվյալ դեպքում չի կարելի չողջունել ԱՄՆ հայկական լոբբիի գործունեությունը «Հայ Դատի» գրասենյակի գլխավորությամբ: «Բացի այդ, Հայաստանը պետք է դադարեցնի լռելյայն համաձայնության պրակտիկան, ԱՄՆ Պետքարտուղարության կողմից Հայաստան ուղարկվող ցանկացած պաշտոնյայի հարցում : Ըստ միջազգային իրավունքի, մենք իրավունք ունենք համաձայնություն չտալ մի մարդու նշանակմանը, որն առանց պատշաճ հարգանքի է վերաբերվում մեր պատմությանն ու ժողովրդին»,-ընդգծել է հայ քաղաքագետը: