Թուրքիայում Բուլղարիայի դեսպանը կանչվել է Արտաքին գործերի նախարարություն, որտեղ նրան տեղեկացրել են՝ ապրիլի 24-ին «1915-ի դեպքերի վերաբերյալ» երկրի խորհրդարանի կողմից ընդունված բանաձևը բացասական հետք է թողնելու երկու երկրների հարաբերությունների վրա:
Թուրքիայի ԱԳՆ կայքը հայտնում է՝ թուրքական կողմը նշել է, որ դա բարեկամական քայլ չէ, և Թուրքիան ժխտում է իր պատմությանն ուղղված այդ զրպարտությունը:
Թուրքիայի ԱԳՆ-ն հարևան Բուլղարիայի խորհրդարանին մեղադրել է այդ հարցի առնչությամբ «Թուրքիայի մարդկային և նախաձեռնած քայլերն անտեսելու համար», գրում է Tert.am-ը:
Բուլղարիայի խորհրդարանն ապրիլի 24-ին ձայների157 կողմ և 36 դեմ հարաբերակցությամբ ընդունել է Հայոց ցեղասպանության մասին բանաձևը, ուր մասնավորապես նշված է, որ խորհրդարանը ճանաչում է1915-1922 թվականներին Օսմանյան կայսրության՝ հայ ժողովրդի նկատմամբ գործած ցեղասպանությունը: Բուլղարիայի խորհդարանը նաև ապրիլի 24-ը հռչակել է «Հայ զոհերի յիշատակի օր»:
