Ամերիկյան Google ընկերությունը և չինական TP-LINK-ը մշակել են և ներկայացրել OnHubտնային օգտագործման համար նախատեսված «խելացի» Wi-Fi ռոութերը:

Google-ի ներկայացուցիչները դիտարկում են OnHub-ը որպես տնային պայմաններում օգտագործման համար պատրաստի սարք «առանց լարերի և մշտապես թարթող ինդիկատորների»: Երթուղիչի կարգաբերումների կառավարումն իրականացվում է բջջային հավելվածի միջոցով, որն, այդ թվում, թույլ է տալիս նաև կանոնավորել անլար ցանցին միացած յուրաքանչյուր սարքի թողունկությունն ու առաջնայնությունը:

OnHub-ը ինքնուրույն կտեղադրի անհրաժեշտ թարմացումները: Ինչպես խոստանում են Google-ի ներկայացուցիչները, թարմացումների շնորհիվ ապագայում ռոութերը կաջակցի ցանկացած անլար սարքի միացմանը ցանցին, նույնիսկ Bluetooth-ով: Երթուղիչում տեղադրված է 6 անտենա 2,4 ԳՀց հաճախականության կապի համար և 6 անտենա 5 ԳՀց հաճախականության համար: Նախնական պատվերը մատչելի է ԱՄՆ 199,99 դոլարով (մոտ 95.000 դրամ ընթացիկ փոխարժեքով): Սարքը վաճառքում կհայտնվի մի քանի շաբաթվա ընթացքում:

TP-LINK համակարգչային և հեռահաղորդակցային սարքավորումների արտադրող է: Ընկերության գլխավոր գրասենյակը գտնվում է Չինաստանում: