Հունվարի 29-ին ՀՀ պաշտպանության նախարարի առաջին տեղակալ Դավիթ Տոնոյանն ընդունել է Հայաստանում Ռումինիայի գործերի ժամանակավոր հավատարմատար Բոգդան Թեբրեային և նորանշանակ ռազմական կցորդ փոխգնդապետ Սանդու Վալերիկա Պիրոսկային (նստավայրը Թբիլիսի):

Հանդիպման ընթացքում քննարկվել են Ռումինիայի հետ պաշտպանական բնագավառում երկկողմ գործակցությանն առնչվող հարցեր: Կողմերը հաստատել են գործակցության զարգացման պատրաստակամությունը և պայմանավորվել են 2016-ի համար մշակել պաշտպանական բնագավառում գործակցության իրատեսական ծրագիր:

Քննարկվել են նաև տարածաշրջանային անվտանգությանն առնչվող հարցեր:

1999թ. հուլիսի 26-ին Բուխարեստում Հայաստանի Հանրապետության պաշտպանության նախարարության և Ռումինիայի ազգային պաշտպանության նախարարության միջև համագործակցության մասին համաձայնագիր է ստորագրվել:

ՀՀ և Ռումինիայի միջև դիվանագիտական հարաբերությունները հաստատվել են 1991թ. դեկտեմբերի 17-ին: 2010թ. մարտի 29-ին Ռումինիայում ՀՀ արտակարգ և լիազոր դեսպան է նշանակվել Համլետ Գասպարյանը, որն ապրիլի 12-ին իր հավատարմագրերն է հանձնել Ռումինիայի Նախագահ Տրայան Բասեսկուին:

2013թ. դեկտեմբերի 5-ին ՀՀ-ում Ռումինիայի արտակարգ և լիազոր դեսպան Սորին Վասիլեն իր հավատարմագրերն է հանձնել ՀՀ Նախագահ Սերժ Սարգսյանին: