ԱՄՆ-ն ռազմական ուժեր է տեղակայել սիրիական Մանբիջի շրջանում՝ կասեցնելու համար բախումներն ԻՊ խմբավորման գրոհայինների դեմ պայքարող ուժերի միջև: Այդ մասին լրագրողներին է ասել ԱՄՆ ՊՆ պաշտոնական ներկայացուցիչ, ՌԾՈւ կապիտան Ջեֆ Դևիսը:
Մարտիկների քանակը նա չի նշել՝ ասելով միայն, որ նրանց թիվը հասնում է մի քանի տասնյակի: Ըստ Դևիսի, այդ քայլը կոչված է զսպման երաշխիքների ակնհայտ նշան դառնալու: Նա նշել է, որ նախկինում ԱՄՆ-ն այդպիսի մարտավարություն չի իրականացրել Սիրիայում, գրում է ՏԱՍՍ-ը:
Ավելի վաղ հայտնի դարձավ, որ սիրիական Մանբիջի Ռազմական խորհուրդը հայտարարել է քաղաքն ԱՄՆ գլխավորած կոալիցիայի պաշտպանությանը հանձնելու մասին:
Մինչ այդ Թուրքիայի վարչապետ Բինալի Յըլդըրըմը հայտնել էր, որ երկրի իշխանությունները մտադիր չեն ռազմական գործողություն իրականացնել Մանբիջում առանց ՌԴ կամ ԱՄՆ ուժերի հետ համակարգման, որոնք տեղակայված են տարածաշրջանում: «Առանց համակարգման չի լինի նաև զգալի արդյունք և ամեն ինչ կարող է բարդանալ»,-ասել է նա՝ հավելելով, որ բանակցություններ են ընթանում:
