Ահաբեկչական խմբավորումները քիմիական նյութերը ստանում են Թուրքիայից: Այդ մասին հայտարարել է Սիրիայի ԱԳ նախարար Վալիդ Մուալեմը Դամասկոսում կայացած մամուլի ասուլիսում
Ըստ նրա, Սիրիայի ղեկավարությունն իրազեկել է ՄԱԿ-ին քիմիական նյութերի մասին, որոնք ներկրվել են երկիր, ավելի կոնկրետ Հալեպի արևելք, Թուրքիայի տարածքից ահաբեկիչների կողմից: Նախարարը հավելել է, որ ծայրահեղականները պահեստավորում են քիմիական նյութերը քաղաքներում և բնակավայրերում, հայտնում է ՌԻԱ Նովոստին:
Մուալեմը հավաստիացրել է, որ Սիրիայի կառավարական զորքերը երբեք չեն կիրառել և չեն կիրառի քիմզենք «նույնիսկ ահաբեկիչների դեմ, որոնք սպանում են խաղաղ բնակիչներին»:
Սիրիայի ընդդիմադիր և հեղափոխական ուժերի ազգային կոալիցիան հայտարարել է քիմզենքի կիրառման հետևանքով 80 զոհի մասին Հան Շեյհուն քաղաքում: Եվս 200 տուժած կա: Զինյալ ընդդիմադիրները մեղադրել են կառավարական ուժերին, բանակի հրամանատարությունը հերքում է մեղադրանքները:
Մոսկվան պնդում է, որ միջադեպը հետաքննի Քիմզենքի արգելման կազմակերպությունը, որը կարող է հատուկ խումբ գործուղել Իդլիբ:
