Ամերիկյան «Ռեալ Սոլթ Լեյքի» հարձակվող Յուրա Մովսիսյանի ապագան անորոշ է՝ ակումբի ղեկավարության կողմից իսպանացի հարձակվող Ալֆրեդո Օրտունյոյին գնելուց հետո: Այս մասին գրում է Fansided սպորտային կայքը:
Salt Lake Tribune-ի փոխանցմամբ, ակումբի ղեկավարությունն օրերս հայտարարել էր, որ պայմանագիր է ստորագրել իսպանացի ֆուտբոլիստին գնելու համար:
«Ամենայն հավանականությամբ, Ալֆրեդո Օրտունյոն, ակումբին միանալուց անմիջապես հետո խաղադաշտ է դուրս գալու: Սա մի շարք հարցեր է առաջացնում, օրինակ այն մասին, թե ինչ է անելու «Ռեալ Սոլթ Լեյքը» Յուրա Մովսիսյանի հետ, որն ակումբի երբևէ ամենաբարձր վարձատրվող խաղացողն է», - գրում է կայքը:
Մայք Փիթքի՝ ակումբի գլխավոր մարզիչ նշանակվելուց հետո Մովսիսյանի՝ խաղադաշտում գտնվելու ժամանակը նվազել է:
Հայաստանի ազգային հավաքականի նախկին խաղացող Յուրա Մովսիսյանը հայտնի է իր ելույթներով դանիական «Ռանդերսում», ռուսական «Կրասնոդարում», Մոսկվայի «Սպարտակում»: Հայաստանի հավաքականի կազմում Մովսիսյանը մասնակցել է 34 հանդիպման և դարձել 9 գոլի հեղինակ: