ՀՀ երկրորդ նախագահ Ռոբերտ Քոչարյանի և մյուս ամբաստանյալների գործով դատական նիստի ժամանակ փաստաբան Հայկ Ալումյանը ներկայացրել է միջնորդություն՝ Քոչարյանի խափանման միջոց կալանքը փոխելու մասին, տեղեկացնում է Shantnews.am-ը։

ՀՀ և Արցախի նախկին վարչապետերը երաշխավորել են, որ խափանման միջոց կալանքը փոխելու դեպքում Քոչարյանը չի խոչընդոտի դատաքննությանը։

Ալումյանը ներկայացրել է Հայաստանի նախկին 3 վարչապետի՝ Խոսրով Հարությունյանի, Վազգեն Մանուկյանի, Կարեն Կարապետյանի գրավոր երաշխավորությունները և Արցախի նախկին վարչապետ Անուշավան Դանիելյանի գրավոր երաշխավորությունն այն մասին, որ Քոչարյանը չի խոչընդոտի դատաքննության ընթացքին, չի թաքնվի քննությունից և պատշաճ կներկայանա դատական նիստերին:

Կարեն Կարապետյանը, Վազգեն Մանուկյանը, Խոսրով Հարությունյանն ու Անուշավան Դանիելյանն այցելել են Երևանի ընդհանուր իրավասության դատարան, հաստատել իրենց երաշխավորությունը։ Քանի որ նրանց ներկայության կարիք այլևս չկար, նրանք հեռացել են նիստերի դահլիճից։

Սահմանադրական կարգի ենթադրյալ տապալման գործով անցնում են ՀՀ երկրորդ նախագահ Ռոբերտ Քոչարյանը, Սեյրան Օհանյանը, Արմեն Գևորգյանը և Յուրի Խաչատուրովը։