Տավուշի մարզի սահմանամերձ Բերդավան համայնքում հայտնված և ՀՀ պահպանվող պետական սահմանն ապօրինի հատելու համար ձերբակալված ադրբեջանցին կալանավորվել է, PanARMENIAN.Net-ին ասացին Ազգային անվտանգության ծառայությունում։

«Անձին մեղադրանք է առաջադրվել Քրեական օրենսգրքի 329-րդ հոդվածի 1-ին մասի հատկանիշներով՝ առանց սահմանված փաստաթղթերի կամ առանց պատշաճ թույլտվության Հայաստանի Հանրապետության պահպանվող պետական սահմանը հատելու համար։ Քննիչի կողմից միջնորդություն է ներկայացվել դատարան՝ նրա նկատմամբ կալանավորումը որպես խափանման միջոց ընտրելու մասին, այն բավարարվել է»,- ասացին ԱԱԾ մամուլի կենտրոնից:

ՔՕ նշված հոդվածով մեղադրանք առաջադրվելու դեպքում անձը կարող է պատժվել տուգանքով` նվազագույն աշխատավարձի 200-300-ապատիկի չափով, կամ ազատազրկմամբ` առավելագույնը 3 տարի ժամկետով:

Դեկտեմբերի 11-ին ԱԱԾ-ից հայտնել էին, որ ՀՀ պետական սահմանը ապօրինի հատելու համար ձերբակալվել է մեկ անձ, հարուցվել է քրեական գործ: