«Իմ քայլը» խմբակցության պատգամավոր Վահագն Թևոսյանը դեռ Հանրային հեռարձակողի խորհրդի անդամ չէ, կդառնա, երբ մանդատը վայր դնի: Այս մասին PanARMENIAN.Net-ին ասաց ինքը՝ Թևոսյանը։
Պատգամավորը պատասխանում էր հացին, թե ծանոթ է արդյոք «Հայրենիք» կուսակցության խորհրդի անդամ, իրավապաշտպան Արսեն Բաբայանի հայտարարությանը, որ ինքը Սահմանադրության խախտմամբ է նշանակվել խորհրդի անդամ և կարող է մեկնաբանել այն։
«Ես չեմ ուզում իր հետ բանավեճի մեջ մտնել, բայց ինքը սխալվում է։ Ուղղակի վարչապետը ստորագրել է մրցութային հանձնաժոովի որոշումը՝ օրենքի ուժով։ Ես դեռ խորհրդի անդամ չեմ, մինչև մանդատս չդնեմ, քանի որ արգելվում է Սահմանադրությամբ, որ ես խորհրդի անդամ լինեմ։ Մանդատը կդնեմ, կդառնամ»,- ասաց Թևոսյանը։
Ավելի վաղ, Բաբայանը՝ հղում անելով Սահմանադրության 95 հոդվածին, նշել էր, որ պատգամավորը չի կարող զբաղեցնել որևէ պաշտոն ու կատարել վճարովի աշխատանք։
Թևոսյանը և Վահրամ Մարտիրոսյանն ավելի վաղ նշանակվել էին Հանրային հեռարձակողի խորհրդի անդամներ՝ հաղթելով թափուր տեղի համալրման մրցույթում։