Մեծ Բրիտանիայում ՀՀ դեսպան Վարուժան Ներսեսյանը Միացյալ Թագավորության խորհրդարանում Համայնքների պալատի խոսնակ սըր Լինդսի Հոյլի հետ հանդիպմանը խոսել է Հայաստանի արտաքին քաղաքականության առաջնահերթությունների մասին:
Համայնքների պալատի խոսնակը պատրաստակամություն է հայտնել այսուհետ ևս աջակցել Հայաստանում ժողովրդավարական բարեփոխումներին, տեղեկացնում է ՄԹ-ում ՀՀ դեսպանությունը:
Զրուցակիցներն անդրադարձել են հայ-բրիտանական միջխորհրդարանական հարաբերություններին՝ կարևորելով երկկողմ համագործակցության ամրապնդումն ու ընդլայնումը:
Դեսպան Ներսեսյանը հիշատակել է Մեծ Բրիտանիա-Հայաստան խորհրդարանական համակուսակցական խմբի վերջերս Երևան կատարած այցը պատգամավոր Թիմ Լոթընի գլխավորությամբ։ Նա նշել է, որ այցը հաջողված էր ոչ միայն հայ-բրիտանական բարեկամական կապերի վերահաստատման, այլև միջխորհրդարանական երկխոսության խորացման և ընդլայնման համար։
Մեծ Բրիտանիայի խորհրդարանի շենքի առջև բարձրացվել է Հայաստանի Հանրապետության դրոշը: