ՀՀ էկոնոմիկայի նախարար Վահան Քերոբյանը և Երևանում գտնվող Ասիական զարգացման բանկի փոխնախագահ Շիքսին Չենը քննարկել են Հայաստանում իրականացվող ներդրումային ծրագրերը, որտեղ հնարավոր է ծավալել երկկողմ արդյունավետ համագործակցություն։
Անդրադարձ է կատարվել տրանսպորտային և լոգիստիկ ենթակառուցվածքների բարելավմանը։
Կողմերը խոսել են նաև էներգետիկայի, արդյունաբերության և գյուղատնտեսության ոլորտներում համագործակցության հնարավորությունների, կլիմայի փոփոխության հիմնախնդիրների, ինչպես նաև զբոսաշրջության ոլորտի զարգացման մասին:
Հունիսի 3-ին Ասիական զարգացման բանկի (ԱԶԲ) փոխնախագահ Շիխին Չենը, բանկի ներկայացուցիչներ, «Ճանապարհային դեպարտամենտ» հիմնադրամի գործադիր տնօրեն Գոռ Ավետիսյանի ուղեկցությամբ, այցելել են Հյուսիս-հարավ ճանապարհային միջանցք, դիտարկել ԱԶԲ և ՀՀ կառավարության ֆինանսավորմամբ վերակառուցվող Տրանշ-3-ի Թալին-Լանջիկ հատվածի շինարարական աշխատանքների ընթացքը։
