2022 թվականին, կրթության, գիտության, մշակույթի և սպորտի նախարարի հրամանով, կամավոր ատեստավորման արդյունքում 70% -ից բարձր արդյունք ցուցաբերած Լոռու մարզի 64 ուսուցչի աշխատավարձը բարձրացվել է 30-50%-ով, հայտնում է մարզպետարանը։

Տարվա ընթացքում դպրոցների բյուջեի ճիշտ և արդյունավետ օգտագործման արդյունքում մի շարք դպրոցներում 5-10%-ով ավելացել են մանկավարժների աշխատավարձերը:

Լոռու մարզային ենթակայության թվով 14 հանրակրթական ուսումնական հաստատություններում իրականացվել են թեքահարթակների, հաշմանդամություն ունեցող անձանց համար սանհանգույցների և կրթության առանձնահատուկ պայմանների կարիք ունեցող երեխաների համար հարմարեցված կահավորմամբ սենյակների կառուցման աշխատանքներ:

Նոր շենքային համալիրներ են կառուցվում և վերակառուցվում թվով 5 դպրոցի համար՝ Վանաձորի թիվ 19, Ստեփանավանի թիվ 3, Ալավերդու թիվ 2, Մեդովկայի և Հագվու (մոդուլային տիպի):

Մարզադահլիճներ են կառուցվում և հիմնանորոգվում Լոռու մարզային ենթակայության թվով 7 հանրակրթական ուսումնական հաստատություններում՝ Վանաձորի թիվ 9, 23, 27, Ստեփանավանի թիվ 1 վարժարան, Ագարակի, Վարդաբլուրի, Ալավերդու թիվ 12:

Անհետաձգելի համարվող կապիտալ բնույթի ծրագրեր են իրականացվում Լոռու մարզային ենթակայության թվով 17 հանրակրթական ուսումնական հաստատություններում:

Ավելի վաղ ԿԳՄՍ նախարարությունը հայտարարել էր, որ ատեստավորում անցած ուսուցիչները կստանան 30-50 % հավելավճար, և տեսականորեն ու պրակտիկորեն ուսուցիչը կարող է ստանալ մինչև 400,000 դրամ աշխատավարձ: Նշվել է, որ մեկ դրույք ունեցող ուսուցիչն ատեստավորման արդյունքում 50% աշխատավարձի բարձրացման դեպքում կստանա 300,000 դրամ, որին հավելելով տարակարգերի հավելավճարները, գումարը կարող է հասնել մինչև 400,000-ի: