Հայ-ֆրանսիական տնտեսական համագործակցության շրջանակում նախատեսվում է նորարարական վերականգնվող հիբրիդային էներգիայի արտադրության ծրագիր իրականացնել Լոռու մարզի Փամբակ համայնքի Դեբետ գյուղի «Հայաստանի մանուկներ» բարեգործական հիմնադրամի կենտրոնի տարածքում։ ՀՀ ՏԿԵ նախարարության և «Սոլ Ժես Էներջի» ընկերության միջև կնքվել է փոխըմբռնման հուշագիր:
ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանը «Սոլ Ժես Էներջի» ընկերության գործադիր տնօրեն Արմեն Սեդեֆյանի հետ հանդիպմանը կարևորել է նման նախաձեռնությունները, քանի որ ծրագիրն իր մեջ ներառում է նաև նորագույն հետազոտությունների և զարգացման ինստիտուտի ստեղծում:
Տերտերյանը շեշտել է, որ ՀՀ կառավարության նպատակն է բարձրացնել էներգետիկ անվտանգության մակարդակը՝ նվազեցնելով ածխածնի արտանետումների ծավալները՝ որպես երկրի կայուն զարգացման կենսական անհրաժեշտություն, և ձևավորել կանաչ տնտեսություն, այդ թվում՝ արդյունավետ և նորարարական էներգետիկ լուծումների մշակման միջոցով:
«Սոլ Ժես Էներջի» ընկերության գործադիր տնօրեն Արմեն Սեդեֆյանը շնորհակալություն է հայտնել ընդունելության համար և նշել, որ այն ունի նորարարական լուծումների մշակման, ֆինանսավորման և կառավարման ոլորտում ճանաչված փորձ, այդ թվում՝ արևային և ջրածնային էներգետիկայի ոլորտում։
Սեդեֆյանը կարևորել է երկու երկրի միջև տնտեսական և առևտրային հարաբերություններն ամրապնդելու համար նման ծրագրերի իրականացումը, քանի որ Ֆրանսիան և Հայաստանը ներգրավված են տնտեսական գործակցության ամուր գործընթացում:
