Ռուս ուղղափառ եկեղեցին թեմ է բացում ՀՀ-ում
Հայաստանում Ռուս ուղղափառ եկեղեցու թեմը պետական գրանցման փաստաթղթերը ներկայացրել է Արդարադատության նախարարություն։ Ակնկալվում է, որ գրանցումը տեղի կունենա ապրիլի կեսին, գրում է ՏԱՍՍ-ը։
Թեմի ժամանակավոր կառավարիչ է նշանակվել Աֆրիկայի պատրիարքական նվիրակ միտրոպոլիտ Լեոնիդ Կլինսկին: Հայաստանում թեմ ստեղծելու մասին որոշումը Ռուս ուղղափառ եկեղեցու Սուրբ սինոդը կայացրել է 2021 թվականի հոկտեմբերին։
«Փաստաթղթերը ներկայացրել ենք գրանցման, Հայաստանի օրենքով ընթացակարգը տևում է մինչև մեկ ամիս»,- հայտնել են թեմում։
Միտրոպոլիտ Լեոնիդը մի քանի օր առաջ է այցելել Հայաստան։ Կիրակի նա սուրբ պատարագ է մատուցել Երևանում, զրուցել հոգևորականների և հավատացյալների հետ, հանդիպել է Ամենայն Հայոց կաթողիկոս Գարեգին Երկրորդի հետ։
