Ռուսաստանն ակնկալում է, որ արտատարածաշրջանային խաղացողները չեն միջամտի Հարավային Կովկասում կարգավորման գործընթացներին։ Այս մասին ՌԴ ԱԳ նախարար Սերգեյ Լավրովը հայտարարել է Թուրքիայի արտգործնախարար Մևլութ Չավուշօղլուի հետ բանակցություններին հաջորդած ասուլիսում։
«Մենք հուսով ենք, որ որոշ արտատարածաշրջանային խաղացողներ չեն խանգարի կարգավորման գործընթացներին Անդրկովկասում, կուղղորդեն կողմերին եռակողմ ձևաչափով ձեռք բերված պայմանավորվածությունների խստիվ կատարմանը»,-ասել է նա, գրում է ՏԱՍՍ-ը։
Նախարարն ընդգծել է, որ այդ պայմանավորվածությունները հիմք են հանդիսանում աշխատանքը շարունակելու համար։
Լավրովը նաև ասել է, որ ՌԴ-ն կողմ է տարածաշրջանների երկրների համագործակցության խորացմանը և ողջունում է ՀՀ և Թուրքիայի միջև հարաբերությունների կարգավորման գործընթացը։
«Ողջունում ենք մեր աջակցությամբ սկսված ՀՀ և Թուրքիայի միջև հարաբերությունների կարգավորման գործընթացը, ողջունում ենք տրանսպորտային կապերի և հաղորդակցությունների ապաշրջափակման ջանքերը, և, անշուշտ, Հարավային Կովկասի հետկոնֆլիկտային վերականգնումը»,-ասել է Լավրովը։
Թուրքիայի ԱԳ նախարար Մևլութ Չավուշօղլուն հայտարարել է Անկարայում իր ռուս գործընկեր Սերգեյ Լավրովի հետ բանակցություններից հետո հայտարարել է, որ Թուրքիան անհրաժեշտ է համարում Հայաստանի և Ադրբեջանի միջև խաղաղության պայմանագրի շուտափույթ կնքումը։
