Արցախի նախկին պետնախարար Ռուբեն Վարդանյանը BusinessFM-ին տված հարցազրույցում, մեկնաբանելով Ադրբեջանի նախագահի ապրիլի 18-ի հայտարարությունները, ասել է, որ որքան ավելի կոշտ ու սպառնալից է դառնում հռետորաբանությունը, այնքան մեծանում է հավանականությունը, որ վաղ թե ուշ Իլհամ Ալիևը ստիպված է լինելու կանգնել Հաագայի միջազգային դատարանի առջև:

Ադրբեջանի նախագահ Իլհամ Ալիևը ապրիլի 18-ի իր ելույթում հայտարարել է, որ Հայաստանը պետք է հաստատի, որ տարածքային պահանջներ չունի Բաքվից՝ պաշտոնապես հայտարարելով, որ Ղարաբաղը Ադրբեջանի մաս է։ Նա նաև ասել է, որ Ղարաբաղի հայերը պետք է ընտրեն՝ «կամ ընդունեն Ադրբեջանի քաղաքացիությունը, կամ բնակության այլ վայր փնտրեն»:

Վարդանյանը նշել է, որ կարծում էր, թե «Ալիևը լավ խորհրդականներ ունի, բայց, ինչպես երևում է այս հայտարարություններից, նրանք բոլորովին անպիտան են»։

«Ես խորհուրդ կտայի Ալիևին ազատել նրանց աշխատանքից, քանի որ որքան շատ է այդպիսի հռետորաբանություն հնչում, որքան ավելի կոշտ ու սպառնալից է այն դառնում, այնքան մեծ է հավանականությունը, որ վաղ թե ուշ պարոն Ալիևը ստիպված է լինելու կանգնել Հաագայի միջազգային դատարանի առջև:

Ես վատ եմ պատկերացնում, թե ինչ միջոցներով է ադրբեջանական պետությունը կարողանալու վտարել հայրենիքից 120,000 հայերին: Ամեն դեպքում, դա կլինի մարդկության դեմ հանցագործություն: Որքան աճում է ճնշումն արցախցիների վրա, այնքան ավելի են նրանք համախմբվում և կողք կողքի կանգնում։ Այս իմաստով, ինձ թվում է, սա ճանապարհ է, որը ոչ մի տեղ չիտանում»,-ասել է Վարդանյանը։

ՄԱԿ-ի Արդարադատության (Հաագայի) միջազգային դատարանը պահանջել է Ադրբեջանից ապահովել անխափան տեղաշարժը Լաչինի միջանցքով՝ մասամբ բավարարելով Ադրբեջանի դեմ միջանկյալ միջոց կիրառելու Հայաստանի դիմումը։ Դատարանը միաձայն մերժել է Ադրբեջանի դիմումն ընդդեմ Հայաստանի։ Բաքուն միջազգային ատյանից պահանջել էր Հայաստանին պարտավորեցնել «վերջ տալ ականապատումներին ու Լաչինի միջանցքով ականներ փոխադրելուն»:

Դեկտեմբերի 12-ին Լաչինի միջանցքի Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին: Դեկտեմբերի 13-ին Ադրբեջանը նաև փակել էր գազի մուտքը ԼՂ, որի մատակարարումը վերականգնվել է դեկտեմբերի 16-ին, որից հետո գազը պարբերաբար անջատվում է, միացվում մասնակի, կրկին անջատվում։ Հունվարի 10-ից Արցախում հովհարային անջատումներ են` հնարավոր չէ վերացնել վթարը Գորիս-Ստեփանակերտ միակ բարձրավոլտ գծի 33-րդ կմ-ում։ Առաջին անհրաժեշտության սննդամթերքը վաճառվում է կտրոններով։

Ընթերցեք նաև․ Վարդանյան. Միակ ճանապարհը նորմալ բանակցություններն են, որտեղ Ադրբեջանը պետք է ճանաչի մյուս կողմին՝ Արցախի Հանրապետությունը