Երևանում վաղ առավոտից բողոքի իրազեկման ակցիաներ են իրականացվել՝ մասնակիցները փողոցներ են փակել՝ ի աջակցություն Արցախի։ Նրանք քաղաքացիներին կոչ են արել մասնակցել հուլիսի 25-ին Ազատության հրապարակում կայանալիք հանրահավաքին։

«Մենք Արցախն ենք» նախաձեռնության անդամները, միանալով արցախյան համաժողովրդական շարժմանը, մի քանի րոպեով փակել են Բաղրամյան պողոտայի և Մոսկովյան փողոցի խաչմերուկը: Նրանց ձեռքներին պաստառներ են, որոնց վրա գրված է` «Մենք Արցախի կողքին ենք», «Բացե՛ք կյանքի ճանապարհը», հայտնում է Sputnik Արմենիան։

Նախաձեռնող խմբի անդամ Լիանա Պետրոսյանը հայտարարել է, որ իրենց կարճաժամկետ ակցիաների նպատակն է Հայաստանի քաղաքացիներին, երևանցիներին իրազեկել, թե ինչ վիճակում են Արցախի մեր հայրենակիցները:

«Մենք կարող ենք 5 րոպեով արգելափակել երթևեկությունը, որպեսզի քաղաքացիներին տեղեկացնենք, թե ինչ է կատարվում Արցախում», - լրագրողների հետ զրույցում ասել է Պետրոսյանը։

Նրա խոսքով՝ իրենց նախաձեռնության նպատակը մեկն է` հնարավորինս շատ քաղաքացիներ միանան իրենց։

Պետրոսյանը հետագա գործողությունների մասին մանրամասներ չի հայտնել։

Շարժման մասնակիցները կարճ ժամանակով փակել են նաև Խանջյան և Գրիգոր Լուրսավորչի փողոցները։

Նրանք ակցիան ավարտել են Աբովյան-Սայաթ-Նովա փողոցների խաչմերուկում և քաղաքացիներին կոչ արել հուլիսի 25-ին՝ ժամը 20:00-ին, հավաքվել Ազատության հրապարակում։

Լաչինի միջանցքը փակ է 2022-ի դեկտեմբերի 12-ից: 2023-ի ապրիլի 23-ին Ադրբեջանը հսկիչ անցագրային կետ է տեղակայել Լաչին-Ստեփանակերտ ճանապարհին։ Հուլիսի 11-ին Ադրբեջանի սահմանապահ ծառայությունը ամբողջությամբ արգելափակել է Լաչինի միջանցքը՝ փակելով այնտեղ ապօրինի տեղադրված անցակետը։ Բաքվի պատճառաբանությունն այն է, թե իբր ԿԽՄԿ մեքենաներում մաքսանենգ ապրանքներ են հայտնաբերվել։ Բաքուն հայտարարել է, թե երթևեկությունը միջանցքով ժամանակավորապես կասեցվել է «մինչև անհրաժեշտ քննչական գործողությունների ավարտը»: Հուլիսի 14-ին ԿԽՄԿ մեկ մեքենա է անցել, որից հետո կրկին ոչ մի մեքենա չի անցել։