ՀՀ սահմաններին իրադրությամբ և զոհերով պայմանավորված Երևանի ավագանու ընտրություններին մասնակցող մի շարք քաղաքական ուժեր հայտարարել են, որ սեպտեմբերի 1–ին քարոզարշավ չեն իրականացնի։
«Ապրելու երկիր» կուսակցության նախագահ Մանե Թանդիլյանը տեղեկացրել է այդ մասին ֆեյսբուքյան իր էջում։
«Հայ զինվորի կողքին ենք․․․»,–գրել է նա։
«Մայր Հայաստան» շարժման ղեկավար Անդրանիկ Թևանյանը ֆեյսբուքյան եթերում ասել է, որ դաշինքը չեղարկում է նախընտրական հանդիպումները, իսկ ինքը թիմակիցների հետ ուղևորվում է Սոթք:
«Թիմակիցներով գնում եմ Սոթքի ուղղությամբ՝ տեղում իրավիճակին ծանոթանալու և մեր հայրենակիցների հետ լինելու համար»,–նշել է նա:
Քարոզարշավը կասեցրել են նաև «Հանուն սոցիալական արդարության» և «Ազգային առաջընթաց» կուսակցությունները։
Ավելի ուշ հայտնի դարձավ, որ «Քաղաքացիական պայմանագիր» կուսակցությունը ևս նախատեսված քարոզարշավը չի իրականացնելու: Այդ մասին հայտնել է նախընտրական շտաբը։
Երևանի ավագանու ընտրությունները տեղի կունենան սեպտեմբերի 17-ին։ Քարոզարշավը կտևի մինչև սեպտեմբերի 15-ը։