Ֆրանսիական Le Figaro–ի փոխտնօրեն Ժան-Քրիստոֆ Բյուիսոնը, անդրադառնալով ՀՀ ու Ֆրանսիայի միջև կնքված պայմանագրին, տեղեկացրել է, որ Երևանը 36 միավոր CAESAR համակարգ է գնել, որոնք կմատակարարվեն 15 ամսում։ Այդ մասին նա գրել է X-ի իր միկրոբոլոգում։

«Ադրբեջանից իր պաշտպանությունն ուժեղացնելու նպատակով Հայաստանը Ֆրանսիայից 36 CAESAR հրետանային համակարգ է գնել, որոնք պետք է մատակարարվեն առաջիկա 15 ամսում»,–ասվում է գրառման մեջ։

Երևանն ու Փարիզը CAESAR թնդանոթների ձեռքբերման պայմանագիր են կնքել։ Հունիսի 17-ին Սուրեն Պապիկյանը Փարիզում հանդիպել է Ֆրանսիայի զինված ուժերի նախարար Սեբաստիեն Լըկորնյուի հետ՝ կողմերը կարևորել են ռազմատեխնիկական գործակցությունը, որի շուրջ ձեռք են բերվել նոր պայմանավորվածություններ:

ՀՀ պաշտպանության նախարարության և KNDS ֆրանսիական ռազմարդյունաբերական ընկերության միջև կնքվել է ռազմատեխնիկական համագործակցության պայմանագիր։ Պապիկյանը մասնակցել է Eurosatory միջազգային ցուցահանդեսի բացման արարողությանը, շրջել է տաղավարներում, ծանոթացել ներկայացված ցուցանմուշներին, հանդիպումներ ունեցել ռազմարդյունաբերական մի շարք ընկերությունների ներկայացուցիչների հետ։