Հունիսի 23–ին ՌԴ Դաղստանի Դերբենտ և Մախաչկալա քաղաքներում անհայտ անձինք հարձակվել են սինագոգի, եկեղեցիների և ՃՏՈ հենակետի վրա։ Հարձակման արդյունքում զոհվել է մոտ 20 մարդ, որոնցից 15–ը ոստիկան։ Այդ մասին հայտարարել է Դաղստանի ղեկավար Սերգեյ Մելիկովը։

Զոհերի թվում կան նաև քաղաքացիական անձինք, այդ թվում՝ ՌՈւԵ քահանա։ Դաղստանում եռօրյա սուգ է հայտարարվել։

«Ավելի քան 15 ոստիկան դարձավ ահաբեկչության զոհ՝ զենքը ձեռքին պաշտպանելով Դաղստանի անդորրն ու խաղաղությունը»,–ասել է Մելիկովը, հայտնում է ՌԻԱ Նովոստին։

Հունիսի 23–ին մարտեր են ընթացել Դերբենտի և Մախաչկալայի փողոցներում։

Իրավապահները հայտարարել են, որ հարձակվողները միջազգային ահաբեկչական կազմակերպության հետևորդներ են՝ «կհստակեցվեն նրանց համակարգողներն ու կազմակերպիչները»։

Հունիսի 24–ի դրության հակաահաբեկչական գործողության ակտիվ փուլն ավարտվել է։ Ոչնչացվել է 6 ահաբեկիչ։ Այդ մասին ևս հայտնել է Մելիկովը։

Ըստ ռուսական ԶԼՄ–ների, սպանված ահաբեկիչներից 3–ը ազգակցական կապի մեջ են Դաղտսանի Սերգոկալինյան շրջանի ղեկավար Մագոմեդ Օմարովի հետ՝ երկուսը նրա որդիներն են, իսկ մեկը՝ զարմիկը, գրում է BBC-ին։

ՌԴ նախագահ Վլադիմիր Պուտինը չի մեկնաբանել Դաղստանի իրադարձությունները։