Ադրբեջանի ԱԳՆ մամուլի քարտուղար Այհան Հաջիզադեն, անդրադառնալով Արցախի ռազմաքաղաքական ղեկավարութանն ու մյուս հայ գերիներին ազատելու կոչերին, հայտարարել է, թե հայ ռազմագերիներին վերադարձնելու հարցում Ադրբեջանը ոչ մի պարտավորություն չունի:

Նա «հանցագործներ» և «անջատողական ռեժիմի ներկայացուցիչներ» է անվանել Արցախի ղեկավարներին և ասել է, թե Ադրբեջանը Հայաստանին է փոխանցել բոլոր ռազմագերիներին։

«Ադրբեջանը մինչ օրս, ելնելով մարդասիրական սկզբունքներից, բոլոր ռազմագերիներին վերադարձրել է Հայաստանին»,–ասել է նա, գրում է Minval.az-ը։

Հաջիզադեն նաև փաստացի մեղադրել է հայկական կողմին «Ադրբեջանից վերադառնալուց հետո ռազմագերիների զանգվածային կալանավորումների և հետապնդումների» մեջ։

Անդրադառնալով ՀՀ վարչապետ Նիկոլ Փաշինյանի ելույթին «Երևանյան երկխոսության» համաժողովում՝ Ադրբեջանի ԱԳՆ ներկայացուցիչը այն անվանել է «իրողությունների ակնհայտ խեղաթյուրում»։ Նա կրկին ասել է, որ առանց չհամաձայնեցված կետերի խաղաղության պայմանագրի նախագիծը ստորագրելու առաջարկն անընդունելի է։

Պաշտոնական տվյալներով` Ադրբեջանում 23 հայ գերի է պահվում, որոնցից 17-ը գերեվարվել են 2023 թվականի ագրեսիայի հետևանքով։

Բաքվի դատարանը 5 ամսով երկարացրել է Արցախի նախկին պետնախարար, բարերար Ռուբեն Վարդանյանի, Արցախ ռազմաքաղաքական ղեկավարության ներկայացուցիչներ Արայիկ Հարությունյանի, Բակո Սահակյանի, Արկադի Ղուկասյանի, Դավիթ Բաբայանի, Դավիթ Իշխանյանի, Դավիթ Մանուկյանի ե Լեոն Մնացականյանի ապօրինի կալանքի ժամկետը։ Նրանք բոլորը ձերբակալվել են 2023-ի սեպտեմբերի վերջին՝ Արցախից ՀՀ անցնելու ժամանակ, երբ ԱՀ-ն հայաթափվեց Ադրբեջանի ագրեսիայի հետևանքով։