Ռուսաստանի նախագահ Վլադիմիր Պուտինը հայտարարել է, որ պատրաստ է հանդիպել ԱՄՆ նախկին նախագահ Դոնալդ Թրամփի հետ և զգում է, որ վերջինս նույնպես հետաքրքրված է հանդիպումով։ Սակայն, նրա խոսքով, բանակցությունների անցկացումն անհնար է առանց մանրակրկիտ նախապատրաստման, հատկապես՝ Ուկրաինայի հարցի կարգավորման ուղղությամբ, հայտնում է ՏԱՍՍ–ը։

«Ես մեծ հաճույքով կհանդիպեմ Դոնալդի հետ, մենք վաղուց չենք տեսնվել։ Կարծում եմ, որ նա նույնպես ցանկանում է, դա զգացվում էր մեր հեռախոսազրույցի բնույթից», - նշել է Ռուսաստանի ղեկավարը։

Պուտինը նաև ընդգծել է, որ հանդիպումը պետք է ունենա հստակ օրակարգ և լինի արդյունավետ։

«Բայց մենք գտնվում ենք այնպիսի իրավիճակում, - շարունակել է նա, - երբ պարզապես հանդիպելն ու թեյ կամ սուրճ խմելը, ապագայի մասին զրուցելը բավարար չէ։ Անհրաժեշտ է, որ մեր թիմերը նախապես պատրաստեն այնպիսի հարցեր, որոնք չափազանց կարևոր են թե՛ ԱՄՆ-ի, թե՛ Ռուսաստանի համար, այդ թվում՝ ուկրաինական ուղղությամբ, որպեսզի գտնվեն երկու կողմերի համար ընդունելի լուծումներ»։

Ռուսաստանի և ԱՄՆ ներկայացուցիչները պայմանավորվել են վերականգնել դեսպանատների լիարժեք աշխատանքը Մոսկվայում և Վաշինգտոնում։