Հայաստանի արտահանման ռազմավարության մշակման գործընթացում առաջնահերթությունը տրվել է արտահանվող ապրանքների որակի բարձրացմանը։ Այդ մասին Հայաստանի խորհրդարանում անցկացվող ԵՄ-Հայաստան խորհրդարանական գործընկերության կոմիտեի 4-րդ նիստում հայտարարել է ՀՀ էկոնոմիկայի փոխնախարար Նարեկ Հովակիմյանը։

Փոխնախարարի խոսքով՝ Հայաստանի նոր արտահանման ռազմավարությունն արդեն մշակվել է և գտնվում է հաստատման փուլում։ Այս գործում կարևոր դեր են ունեցել նաև Եվրոպական միության գործընկերները, հայտնում է Արմենպրեսը։

«Արտահանման ռազմավարության մշակման հիմքում ընկած են եղել այն ուսումնասիրությունները և այն գործող շուկաները, որտեղ մենք դիրքավորված ենք մեր ապրանքներով։ Հիմնականում շեշտադրումն արել ենք որակի վրա, որովհետև մենք հասկանում ենք, որ արտահանման մասին խոսելիս՝ ռազմավարության հիմքում առաջին հերթին պետք է ընկած լինի ապրանքների որակի բարձրացումը և մի շարք երկրների ստանդարտներին համապատասխանեցումը, այլապես արտահանումը շարունակաբար խոցելի կլինի»,- ընդգծել է նա։

Հովակիմյանը նշել է, որ Հայաստանի արտահանման քաղաքականությունը պետք է հիմնվի ոչ թե արտահանվող ապրանքների ծավալի, այլ դրանց որակի վրա։ Այս համատեքստում առանձնահատուկ ուշադրություն է դարձվում ԵՄ-ի հետ համագործակցությանը, որը կնպաստի որակի ենթակառուցվածքների բարելավմանը։

«Պլանում ունենք լաբորատոր կարողությունների զարգացումը, որը մեզ հնարավորություն կտա ՀՀ-ում հավատարմագրված լաբորատորիաներին տրամադրել համապատասխանության գնահատման փաստաթղթեր, որոնք կարող են ճանաչելի լինել նաև Եվրոպական միությունում․ սա է մեր հիմնական նպատակը»,- հավելել է էկոնոմիկայի փոխնախարարը։

Նիստի ընթացքում քննարկվել են ԵՄ-Հայաստան գործընկերության նոր օրակարգը, Համապարփակ և ընդլայնված գործընկերության համաձայնագրի իրականացման ընթացքը, ինչպես նաև ԵՄ աջակցությունը Հայաստանի դիմակայունության բարձրացմանը՝ տնտեսական, առևտրային և էներգետիկ համագործակցության ու դիվերսիֆիկացիայի միջոցով։ Օրակարգում էր նաև ԵՄ-Հայաստան համագործակցությունը՝ տարածաշրջանային և գլոբալ անվտանգության մարտահրավերների համատեքստում, ինչպես նաև Հայաստանի և հարևան երկրների միջև հարաբերությունների կարգավորման գործընթացին առնչվող հարցերը։