Հայաստանի վարչապետ Նիկոլ Փաշինյանն ընդունել է «Ռասմուսեն Գլոբալ» միջազգային քաղաքական խորհրդատվական կազմակերպության հիմնադիր և ՆԱՏՕ-ի նախկին գլխավոր քարտուղար Անդերս Ֆոգ Ռասմուսենին՝ կողմերը քննարկել են տարածաշրջանի վերջին զարգացումները։
Հատկապես, ուշադրության կենտրոնում է եղել Հայաստանի և Ադրբեջանի միջև խաղաղության ու միջպետական հարաբերությունների հաստատման համաձայնագրի նախագծի տեքստի համաձայնեցման և այդ գործընթացի ավարտի հարցը։
Փաշինյանը կարևորել է համաձայնագիրը ստորագրելու՝ Հայաստանի պատրաստակամությունը՝ նշելով, որ այն միտված է տարածաշրջանում խաղաղության և կայունության ամրապնդմանը։
Քննարկման թեմա են դարձել նաև Հայաստանի ու Եվրոպական միության համագործակցությունն ու ԵՄ աջակցությամբ մեր երկրում ընթացող բարեփոխումները։
Վարչապետ Նիկոլ Փաշինյանը մի քանի անգամ հայտարարել է, որ Հայաստանի և Ադրբեջանի միջև խաղաղության համաձայնագրի նախագիծն արդեն համաձայնեցված է և սպասում է վերջնական ստորագրման։ Նա նշել է, որ Ադրբեջանի նախագահին առաջարկում է նախաձեռնել խորհրդակցություններ համաձայնագրի համաձայնեցված նախագծի ստորագրման շուրջ։
Մարտի 13–ին ՀՀ ԱԳՆ–ն հայտարարել է, որ ընդունել է չհամաձայնեցված 2 հոդվածի վերաբերյալ ադրբեջանական կողմի առաջարկները և որ Խաղաղության համաձայնագիրը պատրաստ է ստորագրման: Նշվում է, որ ՀՀ–ն պատրաստ է խորհրդակցություններ սկսել համաձայնագրի ստորագրման ժամկետների և տեղի շուրջ։ Բաքվից առաջ են քաշել նոր նախապայմաններ և հայտարարել, թե դեռ վաղ է խոսել հանդիպման ժամկետների մասին:
