Եվրամիությունը դրական է գնահատել Հայաստանի ու Թուրքիայի միջև Մարգարա-Ալիջան սահմանային անցակետի ժամանակավոր բացումը։ Այդ մասին ասվում է ԵՄ արտաքին գործերի և անվտանգության քաղաքականության ծառայության գլխավոր խոսնակ Անիտա Հիփերի հայտարարության մեջ։

«Բարի կամքի այս դրսևորումը ոչ միայն աջակցություն է Սիրիայի կարիքավորներին, այլև ընդգծում է երկկողմ երկխոսության կարևորությունը և նպաստում Հայաստանի ու Թուրքիայի միջև հարաբերությունների լիարժեք կարգավորմանն ուղղված ջանքերին»,- ասվում է հաղորդագրության մեջ։

Մարդասիրական օգնություն Սիրիա ուղարկելու նպատակով մարտի 21–ից տաս օրով բացվել է Մարգարայի կամուրջը՝ Հայաստանի և Թուրքիայի միջև 32 տարի փակ մնացած սահմանային անցակետը։ Նմանատիպ քայլ է իրականացվել նաև 2023 թվականին, երբ Հայաստանը Մարգարայի կամրջով՝ որը փակ էր 1993-ից, Թուրքիա էր տեղափոխել 100 տոննա հումանիտար բեռ։

ԱԳՆ խոսնակ Անի Բադալյանը հայտնել է, որ ցամաքային ճանապարհով Սիրիա հումանիտար օգնություն հասցնելու լոգիստիկ հարցերը քննարկվել և համաձայնեցվել են Թուրքիայի հետ գործող դիվանագիտական խողովակներով։