ՖԻՖԱ-ի նախագահ Ջանի Ինֆանտինոն խոստացել է անձամբ ներկա գտնվել լեգենդար ֆուտբոլիստ Նիկիտա Սիմոնյանի 100-ամյակին: Այդ մասին ասել է Եվրոպական ֆուտբոլային ասոցիացիաների միության պատվավոր անդամ, ինչպես նաև Ռուսաստանի ֆուտբոլային միության պատվավոր ղեկավար Վյաչեսլավ Կոլոսկովը։

ՖԻՖԱ-ի ղեկավարը իր պատրաստակամությունն արտահայտել է ապրիլի 3-ին Բելգրադում կայացած ՈւԵՖԱ-ի համագումարի ընթացքում, որին ներկա է եղել նաև Կոլոսկովը, գրում է ՏԱՍՍ–ը։

«Նիկիտա Պավլովիչ Սիմոնյանն ինձ խնդրեց հիշեցնել Ինֆանտինոյին, որ նա խոստացել է գալ իր 100-ամյակին: Ինֆանտինոն հաստատեց իր մտադրությունը և ասաց` այո, այո, ես կգամ»,- ասել է Կոլոսկովը։

ԽՍՀՄ վաստակավոր մարզիչ, օլիմպիական չեմպիոն, ինչպես նաև մոսկովյան «Սպարտակ» ակումբի պատմության լավագույն ռմբարկու համարվող Սիմոնյանի հոբելյանական տարեդարձը նշվելու է 2026 թվականի հոկտեմբերի 12-ին։

ՀՀ նախագահի հրամանագրով Նիկիտա Սիմոնյանը պարգևատրվել է Պատվո շքանշանով՝ հայ-ռուսական բարեկամության ամրապնդման, հայկական ֆուտբոլի առաջխաղացմանն ուղղված գործուն աշխատանքի և ոլորտում տարիների նվաճումների համար։ 2013 թվականի հոկտեմբերի 10-ին նա արժանացել է «Հայրենիքին մատուցած ծառայությունների համար» 1-ին աստիճանի մեդալի՝ հայկական ֆուտբոլում ունեցած նշանակալի ներդրումների և ձեռքբերումների համար։

Ֆուտբոլային կարիերայի ընթացքում Սիմոնյանը հանդես է եկել Սուխումի «Դինամո», ինչպես նաև «Կռիլյա Սովետով» և «Սպարտակ» թիմերում։ Խաղալով ԽՍՀՄ ազգային ընտրանու կազմում՝ նա նվաճել է ոսկե մեդալ Մելբուրնում կայացած օլիմպիական խաղերում։ Որպես մարզիչ՝ ղեկավարել է «Սպարտակ» ակումբը և ԽՍՀՄ հավաքականը։Նա մինչ օրս համարվում է «Սպարտակ»-ի պատմության լավագույն ռմբարկուն՝ խփած 160 գնդակով, իսկ ազգային առաջնություններում ունի ամենաբարձր արդյունավետությունը՝ 133 գոլ։