Հայաստանում վերջին 5 տարիների ընթացքում կատարվել է կենդանի դոնորների օրգանների փոխպատվաստման 98 վիրահատություն։ Տվյալներ տրամադրել են առողջապահության նախարարությունից, հայտնում է Sputnik Արմենիան։

Երկրում կենդանի դոնորների օրգանների փոխպատվաստման գործընթացը մեկնարկել է 2019 թվականից, երբ հաստատվել է փոխպատվաստման համար թույլատրելի օրգանների ցանկը։ Այդ ցանկում ընդգրկվել են երիկամները, լյարդը և եղջերաթաղանթը։

Ներկայում Առողջապահության նախարարությունն աշխատանք է տանում ազգային ռեգիստրի ձևավորման ուղղությամբ, որը նախատեսված է դոնորների և ռեցիպիենտների տվյալների համակարգման համար։

«2020-2024 թվականներին պետպատվերի շրջանակում կատարվել է երիկամի փոխպատվաստման 85 և լյարդի փոխպատվաստման 13 վիրահատություն», – նշել են նախարարությունից։

Բոլոր վիրահատությունները կատարվել են կենդանի դոնորների մասնակցությամբ։