Արցախի նախագահ Սամվել Շահրամանյանը նշել է, որ վարչապետ Նիկոլ Փաշինյանի հրաժարականը կարող են պահանջել այս իշխանությունը ձևավորած քաղաքացիները։ Նա այդպես է պատասխանել այն հարցին, թե ինքը պահանջո՞ւմ է ՀՀ վարչապետի հրաժարականը։

«Մենք, այո՛, ունենք մեր դիրքորոշումը, որն այս պահին ճիշտ չեմ գտնում ասել», – նշել է նա, հայտնում է Aysor.am-ը։

Ի պատասխան հարցին, թե ինչու է իրեն կաշկանդված զգում հարցին պատասխանելիս, Շահրամանյանը պարզաբանել է, որ ներկայումս, լինելով Արցախի պաշտոնյա, կոռեկտ չի համարում հրապարակավ արտահայտվել այս թեմայով։

Արցախի նախագահ Սամվել Շահրամանյանը Ազատության հրապարակում հանդիպել է արցախցիների իրավունքների պաշտպանության խորհրդի անդամների հետ։ Խորհրդի ներկայացուցիչները հայտնել են, որ արցախցիների խնդիրների վերաբերյալ առաջարկություն ունեն, որը շուտով կփոխանցեն Արցախի նախագահին, և նշել են, որ առաջիկայում նախատեսում են հանդես գալ հայտարարությամբ։