ԱՄՆ քարտուղար Մարկո Ռուբիոն և Ադրբեջանի արտաքին գործերի նախարար Ջեյհուն Բայրամովը հունվարի 19-ին տեղի ունեցած հեռախոսազրույցում անդրադարձել են տարածաշրջանային իրավիճակին և Ադրբեջանի ու Հայաստանի հարաբերությունների կարգավորման գործընթացին։

Նրանք կարևորել են TRIPP-ի իրականացմանն ուղղված աշխատանքները, հայտնում է APA-ն:

«Բայրամովն իր հերթին ներկայացրել է Ադրբեջանի դիրքորոշումը՝ Հայաստանի հետ հարաբերությունների կարգավորման և խաղաղ գործընթացի հեռանկարների վերաբերյալ։ Դրականորեն են գնահատվել հարաբերությունների կարգավորման շրջանակում ձեռնարկված քայլերը, այդ թվում՝ վստահության ամրապնդման միջոցառումները։ Նշվել է նաև «Թրամփի երթուղի՝ հանուն միջազգային խաղաղության և բարօրության» (TRIPP) նախաձեռնության իրականացման ուղղությամբ տարվող աշխատանքների կարևորությունը»,-ասվում է հրապարակման մեջ:

Կողմերն անդրադարձել են նաև ադրբեջանա-ամերիկյան երկկողմ համագործակցության ներկա վիճակին ու հեռանկարներին:

Շեշտվել է ռազմավարական գործընկերության հուշագրի նախագծի մշակման ուղղությամբ կայացած երկկողմ շփումների և քննարկումների կարևորությունը։ Կողմերն ընդգծել են հուշագրի շուտափույթ համաձայնեցման և ստորագրման ակնկալիքը։ Նշվել է, որ այս ուղղությամբ առաջնահերթությունների ճշգրտումը լրացուցիչ խթան կհանդիսանա երկկողմ հարաբերությունների զարգացման համար։

ՀՀ արտաքին գործերի նախարար Արարատ Միրզոյանը և ԱՄՆ պետքարտուղար Մարկո Ռուբիոն Վաշինգտոնում հաստատել են «Թրամփի ուղի՝ հանուն միջազգային խաղաղության և բարգավաճման»` TRIPP ծրագրի շրջանակում Հայաստան-ԱՄՆ համատեղ աշխատանքի վերաբերյալ փաստաթուղթը։