Միացյալ Թագավորությունում ՌԴ դեսպանատունը հայտարարել է, որ Հայաստանի ընտրություններին ռուսական միջամտության մասին Բրիտանիայի պնդումները «անհեթեթ» են և արտացոլում են Լոնդոնի նեոգաղութատիրական քաղաքականությունը, հայտնում է ՏԱՍՍ-ը:

Դեսպանությունը նշել է, որ Լոնդոնի քաղաքականությունը, որը նախկինում արդեն նպաստել է «Կիևում պետական հեղաշրջմանը, այժմ ուղղված է նաև Հայաստանի դեմ»:

«Երևանում արևմտաեվրոպական ագիտացիոն «դեսանտի» ֆոնին Հայաստանի ընտրություններին միջամտելու վերաբերյալ բրիտանական մեղադրանքներն առավել ևս անհեթեթ են թվում։ Լոնդոնի նեոգաղութատիրական քաղաքականությունը, որը նախկինում արդեն նպաստել է Կիևում պետական հեղաշրջմանը, այժմ ուղղված է նաև Հայաստանի դեմ։ Արևմուտքին ժամանակն է դադարեցնել ինքնիշխան պետությունների գործերին միջամտելը, ինչպես վերջերս արվել է Մոլդովայում և Ռումինիայում։ Գող՝ սիրտը դող», - նշել են դիվանագիտական ներկայացուցչությունում։

Մայիսի 8-ին մեկնարկած նախընտրական քարոզարշավը կշարունակվի մինչև հունիսի 5-ը։ Հունիսի 6-ը կլինի լռության օր, իսկ հունիսի 7-ին կանցկացվեն ընտրությունները։