ՀՀ էկոնոմիկայի նախարար Գևորգ Պապոյանը «Քաղաքացիական պայմանագիր» կուսակցության վարչության նիստից հետո լրագրողների հետ զրույցում, պատասխանելով ՌԴ–ի կողմից արտահանման սահմանափակումների հետևանքով արդյունքում ստեղծված խնդիրների մասին հարցին, ասել է, որ այսպիսի բան պետք է լիներ, որ տնտեսությունը դիվերսֆիկացվեր:

Նա հավելել է, որ լոլիկը շարունակում է է արտահանվել, միաժամանակ դրա զգալի մասը վաճառվում է նաև ներքին շուկայում, հայտնում է Sputnik Արմենիան:

«Այո՛, շուկայում կան որոշակի փոփոխություններ։ Հիմա, օրինակ, լոլիկի գները մի քանի անգամ ցածր են, քան անցած տարի էր։ Բնականաբար, դա արտադրողների համար խնդիրներ է ստեղծում, սպառողների համար ուրախալի լուր է»,– ասել է նա։

Նախարարի գնահատմամբ՝ արտահանման ուղղությունների դիվերսիֆիկացման պայմաններում նման խնդիրները կհասնեն նվազագույն մակարդակի։

«Այս ամենի արդյունքում Հայաստանն ու ՀՀ տնտեսությունն ավելի ուժեղացած են դուրս գալու։ Մի այսպիսի բան պետք է լիներ, որ մեր տնտեսությունը դիվերսֆիկացվեր, հակառակ դեպքում համոզելով, խնդրելով որևէ բան տեղի չէր ունենա»,– ընդգծել է Պապոյանը։

Նրա խոսքով՝ այս պահին որևէ բիզնեսի փակման վերաբերյալ տվյալներ չկան։ Ընդհակառակը, լիազոր մարմինը շարունակել է տարբեր աջակցությունների տրամադրումը բիզնեսին։

Լրագրողներից մեկի հարցին, թե արդյոք Եվրամիության կողմից տրամադրվող 35 մլն եվրոյի աջակցությունը նպատակ ունի Հայաստանում հակառուսական տրամադրություններ գեներացնել, նախարարը կոշտ է արձագանքել։

«Լավ էլի, ժողովուրդ, ե՞րբ եք տեսել մեզ հակառուսական տրամադրություն գեներացնելիս, լավ էլի»,– պատասխանել է նա։

Մայիսի 15-ին «Ռոսսելխոզնադզորը» հայտարարել է մի շարք հայկական ձեռնարկություններ ստուգելու մտադրության մասին։ Պատճառը կեղծ ձկնամթերքի ներմուծման կասկածներն են եղել: Մայիսի 22-ին հայտարարվել է ծաղիկների ներմուծման սահմանափակման մասին, սահմանափակումներ են սահմանվել Հայաստանից ներմուծվող թարմ լոլիկի, վարունգի, պղպեղի, կանաչեղենի և ելակի նկատմամբ։ Հունիսի 2-ից սահմանափակվել է նաև կորիզավոր մրգերի՝ բալի, կեռասի, ծիրանի, սալորի, դեղձի, նեկտարինի և խաղողի ներմուծումը Հայաստանից։ Դրանից հետո վարչապետ Նիկոլ Փաշինյանը հայտարարել է, որ ջերմոցային վարդերի և բանջարեղենի առաջին խմբաքանակները, որոնց ներմուծումը Ռուսաստան կասեցվել էր, կարտահանվեն այլ երկրներ։

Հունիսի 26-ին Ռուսաստանը ընդլայնել է Հայաստանից ձկնամթերքի մատակարարման սահմանափակումները՝ ժամանակավորապես դադարեցնելով հայկական ևս երկու ձեռնարկությունների արտադրանքի սերտիֆիկացումը։