Հայաստանի ու Ռուսաստանի միջեւ հնարավորությունների ներուժը լիարժեք կերպով չի օգտագործվում, ասել է Հայաստանի էկոնոմիկայի նախարար Ներսես Երիցյանը` ելույթ ունենալով «Ռուսաստան-Հայաստան. տնտեսական համագործակցություն» խորագրով խորհրդաժողովում, որ կազմակերպվել է Expo-Russia 2009 Armenia Երկրորդ ռուսաստանյան արդյունաբերական ցուցահանդեսի շրջանակներում: «Պետք է խոստովանել, որ մենք լիարժեք կերպով չենք օգտագործում մեր հնարավորությունների ողջ ներուժը, եւ այդ համատեքստում նման միջոցառումները լավ առիթ են սերտ շփման ու տեղեկատվության փոխանակման, համագործակցության նոր ոլորտների եւ նոր հնարավորությունների որոնման համար»,-ասել է նա:

Ըստ նրա, հարկավոր է մեծ նախագծերի հետ զուգահեռ ակտիվացնել նաեւ համագործակցությունը փոքր ու միջին բիզնեսի ոլորտում: «Այստեղ կարող է հետաքրքիր լինել նաեւ շրջանների, առանձին ընկերությունների ու կազմակերպությունների համագործակցությունը»,-ասել է Երիցյանը:

Միեւնույն ժամանակ, նախարարը հավելել է, որ մասնակից ընկերությունների տպավորիչ ցուցակը վկայում է, որ կա փոխադարձ ցանկություն` խթանել Հայաստանի ու Ռուսաստանի առեւտրատնտեսական համագործակցությունը: