Այսօր Գյումրիի Պատվի բլուր ռուսական զինվորական գերեզմանատանը տեղի է ունեցել ռուս սպաներին նվիրված հուշարձանի հիմնարկեքի արարողությունը, որին մասնակցել են ՀՀ-ում ՌԴ դեսպան Վ. Կովալենկոն, Շիրակի մարզպետ Լ. Նանյանը, Գյումրու քաղաքապետ Վ. Ղուկասյանը, հուշահամալիրի բարեկարգման հանձնաժողովի նախագահ Ա. Նիկողոսյանն եւ այլոք:

Պատվի բլուրը զինվորական գերեզմանատուն է Գյումրիում, որը ստեղծվել է 1855թ. Ռուս-թուքական պատերազմի հրամանատար, Կովկասյան կորպուսի գեներալ Ն. Մուռավյովի հրամանով: Պատվի Բլուրը հայ-ռուսական բարեկամության յուրահատուկ խորհրդանիշ է: Այստեղ իրենց հանգիստն են գտել 156 ռուս սպաների աճյունները: Պատվի բլրի բարեկարգմանն առնչվող կազմակերպչական հարցերը լուծելու, ինչպես նաեւ հայ-ռուսական բազմակողմ համագործակցությունը առավել խորացնելու նպատակով հիմնվեց «Պատվի գործ» հայ-ռուսական բարեգործական կազմակերպությունը: Կազմակերպության համանախագահներ դարձան ՀՀ-ում ՌԴ գիտության, կրթության եւ արվեստի կենտրոնի տնօրեն, ՌԴ դեսպանատան խորհրդական Վիկտոր Կրիվոպուսկովը եւ հասարակական գործիչ, հանձնաժողովի նախագահ Անդրանիկ Նիկողոսյանը:

Ընթացիկ տարվա հունվարին Երեւանում կայացած մամլո ասուլիսի ժամանակ ՌԴ արտաքին գործերի նախարար Սերգեյ Լավրովը հայտարարել է. «Ռուսաստանը երախտապարտ է Հայաստանին 1855 եւ 1877-1878թթ. ռուս-թուրքական պատերազմներում զոհված Գյումրիում ռուսական բանակի 156 սպաների հուշարձանի պատրաստման հարցում աջակցության համար: Մենք պայմանավորվել ենք, որ այդ հուշարձանի բացումը դառնա Հայաստանում Հայրենական Մեծ պատերազմում հաղթանակի 65-ամյակի նշման կարեւոր իրադարձություններից մեկը:

«Մենք հավատարիմ ենք Պատվո բլուրը Մեծ Հաղթանակի 65-ամյակի օրերին բացելու մտադրությանը, ինչը հայ-ռուսական դարավոր բարեկամության եւ ընդհանուր անցյալի եւս մեկ հիշեցում կլինի, ասվում է «Պատվի գործ» հայ-ռուսական բարեգործական կազմակերպության հաղորդագրության մեջ: