ԼՂ տարածքների շուրջ ԵԱՀԿ գնահատման դաշտային առաքելությունը կապ չունի Ադրբեջանի կողմից ՄԱԿ ԳՎ առաջադրած բանաձևի նախագծի դրույթների հետ` չնայած ադրբեջանական կողմի պնդումներին: Այդ մասին Երևանում մամլո ասուլիսում հայտարարել է Հայաստանի արտգործնախարար Էդվարդ Նալբանդյանը Վրաստանի ԱԳՆ ղեկավար Գրիգոլ Վաշաձեի հետ:
Նալբանդյանի խոսքերով, դա ԵԱՀԿ առաքելություն է, և ՄԱԿ կառույցներից դրան մասնակցում են միայն 1-2 հոգի` որպես տեխնիկական փորձագետներ: «ՄԱԿ-ը ոչ մի կառույց կապ չունի այդ առաքելության հետ»,- ասել է ՀՀ ԱԳՆ ղեկավարը:
«Առաքելության նպատակը ղարաբաղյան հակամարտության տարածաշրջանում ընդհանուր իրավիճակն ուսումնասիրելն է: Համանախագահներից երկուսը` Ռոբերտ Բրադկեն (ԱՄՆ) և Իգոր Պոպովը (ՌԴ), վերջերս են նշանակվել, դեռ չեն եղել տարածաշրջանում և մանրամասն ծանոթ չեն իրավիճակի հետ: Նրանք օգտագործում են այս առիթը տեղում իրավիճակին ծանոթանալու համար»,- ասել է նախարարը և ավելացրել, որ հոկտեմբերի 6-ի երեկոյան համանախագահները կժամանեն Երևան:
