ՀՀ փոխվարչապետ, տարածքային կառավարման նախարար Արմեն Գևորգյանը նոյեմբերի 5-ին այցելեց Կոտայքի մարզ, ծանոթացավ Մարմարիկի ջրամբարի վերականգնման աշխատանքների ընթացքին: Ինչպես հաղորդում է նախարարության մամլո ծառայությունը, Համաշխարհային բանկի Ջրամբարների անվտանգության ծրագրի շրջանակում ջրամբարի վերականգնման աշխատանքները մեկնարկել են 2006թ-ին:
Վերակառուցումից հետո ջրամբարը կունենա շուրջ 24 մլն խմ ջուր կուտակելու հնարավորություն, ինչը թույլ կտա ոռոգել Կոտայքի մարզի և Արարատյան դաշտավայրի մոտ 1200 հա տարածք:
Փոխվարչապետին ներկայացվեց աշխատանքների ընթացքը, նշվեց, որ եղանակային անբարենպաստ պայմանների պատճառով փոքր-ինչ հետաձգվում են ջրամբարի միջուկի կառուցման աշխատանքները: Արմեն Գևորգյանը կարևորեց աշխատանքների` որակով և ջրամբարաշինության տեխնոլոգիաների պահպանմամբ իրականացումը:
