24.03.2001. ՄԵԴԻԱՄԱՔՍ, ԵՐԵՎԱՆ. «Թուրքիան անվերապահորեն աջակցում է Ադրբեջանին», հայտարարել է Ադրբեջանի պաշտպանության նախարար Սաֆար Աբիեւը` մեկնաբանելով բանակցությունները թուրքական զինվորականների հետ, որոնք կայացան Հեյդար Ալիեւի վերջերս Ստամբուլ եւ Անկարա կատարած այցի ընթացքում:
Ս. Աբիեւը նշել է, որ Թուրքիայի եւ Ադրբեջանի միջեւ կան ռազմական ոլորտին վերաբերող բավականաչափ համաձայնագրեր: Միաժամանակ, նրա խոսքերով, նոր համաձայնագրերի անհրաժեշտություն կա, որոնց էությունը Աբիեւը հրաժարվեց «բացել»: Պատասխանելով այն հարցին, կարելի է արդյո՞ք թուրքական զինվորականների հետ բանակցություններից հետո պնդել, որ ռազմական գործողությունների դեպքում Թուրքիան լայնածավալ ռազմական օգնություն կցուցաբերի Ադրբեջանին, Աբիեւը ասել է. «Ժամանակը ցույց կտա»:
Անդրադառնալով Թուրքիայում ձեռք բերված պայմանավորվածությունների ընդհանուր ուրվագծերին, նախարարը ասել է, որ «ներկայումս վաղ է եւ բարդ այդ մասին խոսելը»: Նրա խոսքերով, երկու երկրների ռազմական գերատեսչությունների աշխատանքային հատուկ խմբերը կպատրաստեն համաձայնագրի մի նախագիծ, որը կստորագրվի Թուրքիայի Զինված Ուժերի Գլխավոր շտաբի պետ Հուսեյն Քիվրիկօղլու Բաքու կատարելիք այցի ընթացքում: --0--