Մայիսի 25-ին «Դեպի երկխոսություն» ծրագրի շրջանակներում «Էսպաս» երիտասարդական կրթամշակութային կենտրոնում կայացավ հայ և թուրք հեղինակների կողմից համատեղ նկարահանված սիրողական ֆիլմերի ցուցադրություն և քննարկում: 5 ֆիլմերը նկարահանվել են 2010-ի նոյեմբերին: Ֆիլմերը պատմում են հիմնականում երկու քաղաքների, մարդկանց վերաբերմունքի, երկու հասարակությունների զգացողությունների, հավաքական հիշողությունների մասին:

Ծրագրի նպատակն է կինոարվեստի միջոցով առողջ երկխոսության առիթ ստեղծել Հայաստանի և Թուրքիայի հասարակությունների, հատկապես` Գյումրու և Կարսի համայնքների միջև:

Ցուցադրվեցին Աշոտ Միրզոյանի «Ընդհատված երկխոսություն», Օկտայ Ինջեյի, Տարոն Գալոյանի, Արմեն վարդանյանի, Գոհար Սարգսյանի «Հայալ» փաստավավերագրական ֆիլմերը և Աշոտ Վարդանյանի «Վեճ» անիմացիան:

Ծրագրի հովանավորներն են Եվրոպական Երիտասարդական Հիմնադրամը, Եվրոպական մշակութային հիմնադրամը, ԱՄՆ Գերման Մարշալ հիմնադրամը,Բաց հասարակության ինստիտուտի օժանդակության հիմնադրամը:

Ցուցադրության կազմակերպիչներն են Գյումրու Քաղաքային Ուսումնասիրությունների Կենտրոնը և թուրքական Կոզա Վիզուալը: Այս տարվա ընթացքում ֆիլմերի ցուցադրություններ արդեն իրականացվել են Գյումրիում, Կարսում, Ստամբուլում, Անկարայում: Երևանում ֆիլմերը ցուցադրվում են առաջին անգամ: