Ռուսաստանի ներքին գործերի նախարար Ռաշիդ Նուրգալիևը շնորհակալություն է հայտնել իր հայ և ադրբեջանցի պաշտոնակիցներին Ղարաբաղի հարցը չքննարկելու համար Երևանում ընթացող ԱՊՀ երկրների ՆԳՆԽ նիստում: Նման հայտարարություն արեց Նուրգալիևը՝ պատասխանելով Հայաստանի ու Ադրբեջանի ոստիկանության մարմինների համագործակցության հնարավորության մասին ղարաբաղյան հակամարտության համատեքստում:
Ըստ նրա, ՆԳՆԽ-ն քաղաքական կազմակերպություն չէ: «Ես շնորհակալ եմ, որ Ռամիլ Ուսուբովի ու Ալիկ Սարգսյանի միջև այս պահին այդ հարցը չի արծարծվում: Կան հարցեր, որ պետք է լուծեն քաղաքական գործիչները»,-ասել է նա՝ հավելելով, որ նախարարների հիմնարար խնդիրը հանցավորության դեմ պայքարն է:
Իր հերթին ՀՀ ոստիկանապետ Ալիկ Սարգսյանն ասել է, որ երկկողմ հանդիպում ադրբեջանցի պաշտոնակցի հետ նախատեսված չէ: «Մենք հանդիպել ենք նախօրեին, սակայն քաղաքական հարցեր չենք քննարկել: Մեր կառույցներն ապաքաղաքական են: Նա պատասխանատու է իր աշխատանքի համար, ես՝ իմ»,-ասել է Սարգսյանը:
