Նոյեմբերի 4-ին Վիեննայում Միջազգային կազմակերպություններում ՀՀ մշտական ներկայացուցիչ, դեսպան Արման Կիրակոսյանը Վիեննայում ՄԱԿ-ի Գրասենյակի Գլխավոր տնօրեն, ՄԱԿ-ի Թմրամիջոցների և հանցավորության դեմ պայքարի գրասենյակի Գործադիր տնօրեն Յուրի Ֆեդոտովին հանձնեց իր նշանակման մասին ԱԳ նախարար Էդվարդ Նալբանդյանի նամակը: Ինչպես հաղորդում է ՀՀ ԱԳՆ մամլո ծառայությունը, Գործադիր տնօրենը, ողջունելով դեսպան Արման Կիրակոսյանին, ներկայացրեց ՄԱԿ-ի Թմրամիջոցների և հանցավորության դեմ պայքարի գրասենյակի նպատակները, անդրադարձավ Հարավկովկասյան տարածաշրջանում առկա խնդիրներին, ինչպես նաև տարածաշրջանային և երկկողմ մակարդակներում համագործակցության զարգացման հեռանկարներին:
Արման Կիրակոսյանն իր հերթին, շնորհակալություն հայտնելով ընդունելության համար, անդրադարձավ թմրամիջոցների դեմ պայքարի ոլորտում Հայաստանի կառավարության կողմից իրականացվող ծրագրերին և պատրաստակամություն հայտնեց շարունակել ու էլ ավելի զարգացնել համագործակցությունը կազմակերպության հետ: Կողմերը քննարկեցին թմրամիջոցների, կոռուպցիայի, ինչպես նաև մարդկանց թրաֆիկինգի դեմ պայքարի բնագավառում հետագա համագործակցության հնարավոր ուղղությունները և հայտնեցին իրենց շահագրգռվածությունը նոր նախաձեռնություններով հանդես գալու հարցում:
