Ժողովրդական ելույթները Մերձավոր Արևելքում և Հյուսիսային Աֆրիկայում, որոնք հայտնի են որպես «արաբական գարուն», հավանության են արժանանում մարդկանց մեծամասնության կողմից աշխարհի տարբեր երկրներում, բացի ռուսներից: Այդ մասին վկայում է BBC-ի պատվերով անցկացված հասարակական կարծիքի հարցումը, որին մասնակցել է ավելի քան 21 հազար մարդ աշխարհի 22 երկրներից:
Առավել հաճախ «արաբական գարնան» մասին դրական արձագանքներ կարելի է հանդիպել Արևմտյան Եվրոպայի երկրներում. այդ երևույթը հավանում են գերմանացիների և ֆրանսիացիների ավելի քան 75 տոկոսը:
Ռուսաստանը հարցման մասնակիցներից միակն է, որտեղ հասարակական կարծիքը բացասաբար է վերաբերվում արաբական հեղափոխություններին. հարցված ռուսների 43 տոկոսն այդ երևույթը բացասական է գնահատել, իսկ 31 տոկոսը հավանել է:
Հարկ է նկատել, որ հարցումն անցկացվել է դեռևս նախքան Լիբիայում գնդապետ Քադդաֆիի պաշտոնանկ լինելը:
